الواجهة جريدة الكترونية تجدد على مدار الساعة
سعادة (الرايس) نرحب بك مرة أخرى ونشكرك جزيل الشكر على تلبية الدعوة.
مرحبا أنا رهن إشارتكم عاهو الى جات على خاطركم نوقفو عند هاذ الحلقة تايفوت رمضان.
ماكاين تامشكيل أسعادة الرايس.
دابا خيطت 3 جلالب بزيويات كل وحدة فلون وخاصني نبدا نصلي واخا عالتراوح بعدا، راه حشومة تكون رايس وماعمر الناس شافوك فالجامع عا الى مشينا مع العامل فشي مناسبة دينية، منها يشوفوك الناس ومنها مناسبة باش نلبس جلالبي راني شريتهم غالين.
واخا أسعادة الرايس ندخلو فالموضوع وقفنا فالحلقة السابقة عند الواد الحار كاتقول بللي اللجنة ماعندها ماتعرف وماعمرها تحصلنا.
سؤال : شرح لينا كيفاش ؟
دابا مللي شي واحد كايبغي يدير تجزئة التجزئة كلها قوادس كايدير لبلان كاتوافق عليه اللجنة المختصة مهمتها كاتنتهي فالموافقة ماكا تبقاش متبعة المراقبة حنا كانميكو، القادوس ديال ميترو ونص كايدير فيه عاميترو وديال مترو كايدير فيه نص ميترو وديال نص ميترو كايدير فيه 30 سنتيم مثلا وكاينة واحد الرملة رقيقة كايفرشوها لقوادس وكايغطيوهم بها باش تحفظهم مايتهرسوش وهاذ الرملة غالية ماكايديرهاش ولغرق اللي فلبلان كاتكون فيه 3 ميترو كانسمحو ليه فميترو كايحفر عا 2 مترو، هو كياكل خبيز وحنا كاناكلو معاه خبيز.
سؤال : ولجان التفتيش ؟
جواب : اللجن كايلقاو كلشي تردم ما عندهم ما يعرفو وهاذ الشي ديال اللجان حنا راه بغينا نحيدوه مايبقاش شي واحد يجي يبرزطنا.
سؤال : وكيف غادي تديرو تاتحيدوه ؟
جواب: علاه مافخباركمش راحنا درنا جمعية ديال الرؤساء.
سؤال : وماعلاقة الجمعية بلجان التفتيش ؟
جواب : الجمعية درناها باش تحمينا وتدافع لينا على مصالحنا.
سؤال: نتوما نتاخبوكم الناس باش تدافعو ليهم على مصالحهم صبحتو كاتقلبو على اللي يدافع عليكم هذا كايبين على أنكم غير مؤهلين لتسيير الشأن المحلي والدفاع عن مصلحة المواطنين.
جواب: حنا بغينا نبدلو القوانين.
سؤال : عطينا مثل
جواب :أولا هذاك حرف (ج ) فالطوموبيلات ديال الرياس مابقيناش قابلينو بغينا نحيدوه بغينا تاحنا يديرو لينا المغرب الحمرا (Mروج) بحال الباشوات والقياد باش البوليس والجدارمية يعطيونا السلام وما يوقفوناش فالطريق.
سؤال: ولكن أسعادة ( الرايس) واخا يوقفوك الطوموبيل عندها وراقها التأمين على حساب الجماعة نتا ماخاسر والو، الى وقفوك عطيهم لوراق ، بغيتو تعرفو نعم بغينا نعرفو.
جواب: واحد النهار أسيدي أنا بصيفتي “رايس” وصلت عند الجدارمية أنا وقفوني ومول لابيلانص سرحو ليه الطريق دابا بحال الى عاد الشيفور ديال لابيلانص حسن مني وراكبة معايا مرتي وختها ونسيبتي.
شوف اسعادة الرايس لابيلانص راه غاديا بمريض وماخصوش يتعطل.
واخا هذاك لمريض حسن مني؟
سعادة ” الرايس ” ماغاديش نتفاهمو معاك فهاذ النقطة من الأحسن نفوتوها.
سؤال: ندوزو لنقطة أخرى آشنهيا المصالح الأخرى اللي بغات تدافع عليها الجمعية ؟
جواب : ماباقيش تجي عندنا شي لجنة ديال التفتيش ويلى جات نجريو عليها مانخليوهاش تدخل للجماعة وما بقيش تجينا شي استدعاء من عند البوليس ولا من عند الجدارمية كايظلو يخلعو فيا.
سؤال : ولكن أساعدة ( الرايس ) هاذ لكلام اللي كاتقول راه في منتهى الخطورة، الدولة راها عندها مؤسسات رقابية دوستورية مهمتها افتحاص مالية جميع المؤسسات بما فيها الجماعات، “إذا ” نتوما وعلى حساب كلامك بغيتو تصبحو مستقلين عن الدولة اوزارة الداخلية تاهيا خاصها تهز يدها ماباقيش تتدخل فيكم.
جواب: شوف أسيدي حنا عارفين آش كانديرو وزير الداخلية الى جمعنا ليه 200 ولا300 ونقدرو نجمعو تا 500 رايس واعتصمنا ليه قدام الوزارة باقي غادي يقدر يهضر معانا ؟
سعادة (الرايس) هذا راه كلام خطير وكلام كبير بزاف وابتزاز، كايضهر بغيتو تبداو تلعبو بالنار؟
سعادة الرايس جاه تيلفون : ألو الزاهية كي ديرة لباس الحمد لله ونتا ( الرايس ) كي داير عاشوية وصافي ، ياكما مريض لا ما مريض والو انا نيت كنت ناوي نعيط ليك خير ان شاء الله.
سعادة الرايس: سمعي الزاهية عفاك مللي تكوني جايا للدورة نقصي شوية من لعكر ولكحل ولبسي شي لباس يكون يوالم.
الزاهية : شوف (اسعادة ) الرايس هذيك حياتي وأنا حرة فيها تاواحد ماعندو الحق يلاحظ عليا، بغيتيني نجي مكوشرة، مايمكنش راها كاتكون الصحافة وكاينشرو التصاور ديالنا فالفيسبوك ،وانا نبغي نفقص العديان.
سعادة الرايس : والزاهية سمعي سمعي راه واحد النهار مرتي شافت التصاور فالفيسبوك سولتني قالت لي شكون هاذي اللي طالية وجها هاذ الطلية قلت ليها عضوة معانا قالت فاش خدامة قلت ليها : استاذة قالت ليا محال هاذي تكون استاذة سولتني واش مزوجة قلت ليها مزوجة وراجلها طبيب قالت لا لا ماظاهر عليها لازواج لاطبيب لا أستاذة رسلت تصاورك لشي صحاباتها سولتهم قالو ليها الزاهية ماخدامة مامزوجة ، رجعت للدار شعلت معايا دوي الكذاب المنافق هاذي فعايلك هذيك اسمها الزاهية مامزوجة ماأستاذة واش هذاك وجهك ولاقفاك كيفاش سولتك قلتي لي استاذة زعما نت ماعرفهاش؟ قلت ليها أنا عاكانسمع الأعضاء كايقولو ليها تفضلي الأستاذة يحساب لي نيت استاذة، شهر مابقات دوات معايا ومللي دوات عادت كاتعيط ليا عا الكذاب مؤخرا جاتني واحد الضريبة ساهلة شديت فيها طرف جيد ديال لفلوس وشريت ليها برطمة فسميتها فأكادير عاد سكتت عليا.
الزاهية: إوا أسيدي تاأنا راني معيطة ليك على حساب برطمة راني مشيت للجديدة ولقيت شي برطمات عشاقة ب : 36 مليون التسبيق16 وربع ملاين فلعام غادي تعطيني التسبيق اسعادة الرايس وكل عام تعطيني ربع ملاين ويلى كانو الناس كيصوتو بيد وحدة أنا نصوت ليك بزوج يدين واخا الزاهية مايكون عاخاطرك تستاهلي كل خير.
شكرا سعادة الرايس نكتفي بهذا القدر
لا شكر على واجب.
*ملحوظة : “هذا الحوار الافتراضي لا يعني رئيسا معينا ولا جماعة معينة بل يسلط الضوء على بعض الخروقات والاختلالا ت التي تعرفها بعض الجماعات التي لاتحترم الضوابط والمساطر القانونية”
