الواجهة جريدة الكترونية تجدد على مدار الساعة
سعادة الرايس وقفنا في الحلقة الماضية عند لجنة التفتيش : ماحصلتنا فالشنطيات وفلقوادس ديال الواد الحار ولبياس ديال الطومويلات والكاميوات وبغات تحصلنا فلماكلة .
اشرح لينا كيفاش؟
نبداو معاك بالشانطيات أسعادة الرايس
“ج” الشانطيات أسيدي مللي كايبغي شي واحد يدير تجهيزة كايصاب لبلان
بلاتي أسعادة الرايس أشنهيا التجهيزة؟
“ج” هي كايشري الأرض وكايردها سيسان
“س” كيفاش سيسان؟
“ج” السيسان هما الديور
آه باغي تقول تجزئة ؟
“ج” هيا هديك
“س” كفاش كاتديرو ليها ؟
“ج”ماشي حنا اللي كانديو مول التجزئة اللي كايدير حنا مكانديرو والو عاكانسنيو ليه .
” س” وهو آش كايدير مللي تسنيو ليه؟ “ج” كايصايب بلان مللي نسنيو ليه كايعاود يبدلو الطريق اللي فيها 15 مترو كاتعود فيها 12 واللي فيها 12 كاتعود فيها 10 واللي فيها 10 كاتعود فيها 8 وهادوك الطرقان الصغار ديال6 مترو كايحيدهم وكيحد المدارس والمستوصفات وكايحد كلشي داك الشي اللي كاتسميوه المرافق العمومية وكايجيب لينا لبلان وكانسنيوه ليه.
“س” وياك سنيتو ليه فلأول علاش كاتسنيو ليه ثاني.
“ج” حيت بدل لبلان
“س”واللجنة المختصة كاسني معاكم ؟
“ج” كاتسني معانا فلبلان الأول.
“س” والثاني؟
“ج” لا ماكاتسنيش معانا كانسني أنا والمهندس.
“س” والمراقبة لا ماكاينة تامراقبة حيت حنا اللي كانراقبو، بالتي سمحو ليا نجاوب هاذ المصيبة ماعرفت تاهية منين تسلطت عليا.
خذ راحتك أسعادة الرايس.
ألو لالة التايكة لاباس مالاباس والو أسعادة الرايس قول ليا أخويا نتوما كاتضربو الضربات لكبار ديال 300 و400 وحنا مللي نصوتو عليك كاتدير لينا لغدا وتعطينا 100 ألف ريال واش هداك هو حقنا؟ تاحنا راه بغينا نفرحو بوليداتنا وندخلوهم للجامعات وبغيناهم يعودو لينا طبيبات وفرماسينات وبغينا ندوزو العطلة فالشمال سمعي سمعي ياك داك نهار جيتي عندي قلتي ليا ولدك حاصل فشيك ديال 4 ملاين واعطيتها ليك، إيه ولكن العضو فرتلان راك عطيتيه 8 لملاين ، وهنا راك كاتضرب مبدأ المناصفة، واش هاذي هيا المناصفة اللي كاتدوي عليها الدولة ؟ عطينا بحال بحال عفاك كي الراجل كي لمرا وراك مادرتي إلا القانون قانون المناصفة.
بلاتي الآلة التايكة خليني تانا ندوي دوي أسعادة الرايس ، شوفي لقراية ديال ولادك على حسابي فأي جامعة مشاو ليها والتخيام فالشمال تاهو على حسابي اختاري لمدينة اللي بغيتي الدار مفرشة مجهزة والطوموبيل ديال الجماعة تديكم وتجيبكم .
بارك الله فيك أسعادة الرايس ولكن ولدي لكبير ماكايبغيش يخيم معانا ماكايتفاهمش ليا مع ختو وهو كايبغي أكادير، ماشي مشكيل تاهو غادي نعطيه باش يخيم وعلميه من دابا قولي ليه التخيام ديالك على حساب سعادة “الرايس ” أيوا دابا دويتي الله يخليك لينا وزيد فعمرك.
سمحو ليا هاذ المصيبة راها عضوة معايا فلجماعة هانتوما سمعتو كلشي على ودنيكم، الدنيا هانيا أسعادة الرايس نوقفو هنا تاللحلقة المقبلة ونكملو شكرا مرة أخرى سعادة الرايس
لا شكر على واجب
*هذه الحلقات لا تعني رئيسا معينا ولا جماعة معينة بقدر ماتسلط الأضواء على بعض الخروقات والاختلالات في بعض الجماعات الفاسدة التي لا تحترم المساطر القانونية*
