الواجهة جريدة الكترونية تجدد على مدار الساعة
حوار مع سعادة ” الرايس ” ( الحلقة 3 ) بقلم الأستاذ مولاي أحمد بلبهلول
سعادة الرايس :
توقفنا معاك فالحلقة السابقة عند الصفقات اللي كايكونو عا فلوراق ، دابا غادي تجاوبنا على زوج أسئلة , السؤال الأول كيفاش كاتديرو ليهم ؟ و السؤال الثاني واش عا هاذ النوع وحدو من الصفقات اللي كا يكون فلوراق و لا كاين شي صفقات آخرين ؟
هو أسيدي الصفقات فيهم شلا نواع و شلا فلوس ، كا يبداو من 10 ملايين تا ل100 مليون ، هاذ الصفقات الصغار و لكبار راهم كايكونو بالملايير تانخصصو ليهم شي حلقة وحدهم .
شكرا سعادة الرايس، سؤال: وهاذ 100 مليون كيف كا تديرو ليها راها كاتبان صعيبة؟
لا ماصعيبة والو ما وحلنا فلملايير و غادي نوحلو ف100 مليون ، عا نتوما كاتبان ليكم صعيبة ، كون ترشحتو و نجحتو تجيكم ساهلة .
سعادة الرايس غادي نبداو معاك بالصفقة ديال 100 مليون .
كانديرو صفقة ديال العتاد الكهربائي مثلا، تبعو معايا مزيان باش نفهمكم .
ها حنا متبعين معاك اسعادة الرايس .
هاذ الصفقة كا نجيبو 4 الشركات كا يتفاهمو مع بعضياتهم شكون يديها كا يعطيهم نصيبهم و كايدير هو ثمن أقل منهم باش تنزل عليه الصفقة ، مللي تنزل عليه ما كايجيبش السلعة كلها و يلا جابها كندخلوها من الباب تا نقيدوها في السجل و نسنيو عليها و يديها معاه يخللي لينا عا شي شوية باش نقضيو و لوراق فيهم لبولات ديال 4 الاف ريال و هو كايجيب ديال 1000 ريال إيوا حسب 10 الاف بولا شحال بغات تخللي ليك تبارك الله ، الخير و البركة عا اللي مابغاش يقنع ، هاذو غير البولات عاد لبياس لاخور تاهو غالي ، غلى من البولات بزاف .
صافي هاذو هما الصفقات ؟
لا الصفقات أنواع و ألوان .
عطينا شي مثل أ سعادة الرايس .
كاين المازوط تاهو فيه شلا فلوس ، كاين لبياس ديال الكاميوات و الطوموبيلات كاين بزاف ، دابا شرينا تراكتور حيت معانا شي نواب كا يفلحو عندهم التراكتورات و كايبغيو لبياس ، شريناه باش نشريو ليهم لبياس و نحسبوه على التراكتور ديال الجماعة .
لبياس ديال الطوموبيلات كيف كاتديرو ليه ؟
لبياس أسيدي تاهو كانديرو ليه بحال العتاد الكهربائي تاهو راه غالي ، و النواب واخا عندهم طوموبيلات ديال الجماعة كانعطيوهم المازوط و لبياس و لبنوات لطومويبلات ديال ولادهم و بناتهم كلشي على حساب الجماعة .
ماكتفكرش الرايس تخلي شي بصمة يذكروك بها سكان الجماعة مللي تكمل هاذ الفترة ؟
لاش نخليها مالي ناوي نبقى ساكن معاهم ، عا نكمل و نتحول لشي مدينة سياحية و ندي ولادي يتبرعو .
سمح لينا أسعادة الرايس بغينا نطرحو عليك واحد السؤال واخا محرج .
لا لا ماكاين تا إحراج خذو راحتكم سولو كي بغيتو .
هاذ الشي اللي كاتقول راه خطير ، واش السلطة ما فخبارهاش ؟
السلطة مشات مع الوزير البصري كنا كا نخافو كان كا يرسل لجنة ديال التفتيش أسبوع يجي العزل كا يبلغوه ليك و تهز إلى عندك شي قشاوش فلمجر و تخرج يديك فوق راسك ، أما دابا واخا يجيو 10 اللجن خاص العامل يرفع دعوى للقضاء الإداري و القضاء يعطيك المدة الكافية باش تدير محامي و تدافع على راسك .
معنى هذا كي كا يقولو الناس تقادو لكتاف ؟
ماشي عا تقادو راه الى ترفضت ليه الدعوى و غلبناه راحنا ما باقيش نحيرو فيه تا دوك الاجتماعات ديالو مانمشيوش ليها و جهدو يجريه .
واخا العامل ما تحيروش فيه و علاقتكم مع رجال السلطة لاخرين كي دايرة ؟
هادوك عادو كا يطلبو عا السلامة ، علاه ما فخباركمش شحال من واحد حولوه المنتخبون ؟
لا أسعادة الرايس مافخبارناش ، شرح لينا نتا اللي فخبارك .
واخا أسيدي غادي نشرح ليكم ، دابا شي رجل سلطة إلى بغا يحضينا و لا يحاسبنا كا نتجمعو و كا نعيطو لشي واحد كا نقولو ليه نشر لينا هذا الموضوع راحنا بغينا نقدمو استقالتنا من الجماعة و الحزب .
و كاتقدموها ؟
لا مالنا هبلنا تا نقدموها واخا يجرونا على كروشنا تا لبني عمير و لا حد كورت ما نقدموها ، عا كا نبغيو نخلعوهم ، كا نكتبو الاستقالة كا ينشرها كا نتاصلو ” بلامين ” .
لامين ديال الطاكسيات و لا ديال السفناجة ؟
ألا يا ، مالكم ما كا تفهموش ، لامين ديال الحزب كا نمشيو عندو كانديو ليه المقال اللي نشرنا فالجورنال كا نقولو ليه بغينا نقدمو استقالتنا من الجماعة و الحزب رجل السلطة الفولاني كا يضايقنا و مامخليناش نخدمو , ” لامين ” كا يدور التيلفون قدامنا لشي وزير ديال الحزب و كا يدوي معاه بالغوت : واش نتوما كاينين فهاذ لبلاد و لا ما كاينينش ؟ واش فخباركم آش جاري و لا ما فخباركمش ؟ جماعة ” الموزمبيق ” السلطة كا تخدم ضد الحزب غادي تتاصل دابا بالوزير الفولاني إما يتخذ الإجراءات اللازمة و إما خبر الاسقالة سينتشر كالنار في الهشيم و نحملوه المسؤولية الكاملة ، هاذي راها سمعة المغرب ، آش غادي نقولو للاتحاد الأوروبي ، و الاتحاد الإفريقي لكرة القدم ، آش غادي نقولو لإتحاد سيدي قاسم ، و الاتحاد الزموري لخميسات ، و الاتحاد النسوي ؟ و مجلة “التايمز” الأمريكية ، “و الواشنطن بوسط” و جريدة ”البايس” الإسبانية و زيد و زيد شلا مكا يقول ……
سعادة الرايس نكتفي بهاذا القدر نشكركم جزيل الشكر وإلى الحلقة القادمة .
لا شكر على واجب .
* ملحوظة هذه الحوارات لا تعني رئيسا معينا و لا جماعة معينة بقدر ما تسلط الضوء على بعض الاختلالات في الجماعات الفاسدة .
بقلم الأستاذ مولاي أحمد بلبهلول .
